BEOWULF
a new critical text based on an examination of the original MS
Images of the Beowulf MS are reproduced by kind permission of the British Library Board (who retain copyright)
All other material on this site under copyright 2002-5, Benjamin Slade
Please include proper citation reference if quoting a short passage;
otherwise no part of these documents may be reproduced without expressed permission from the author.
last updated on 15-June-2005

XXI
(B)EOWVLF maþelode     bearn ecgþeo[w]es 1383
ne sorga snotor guma     selre bið æghwæm
þæt he his freond wrece    þonne he fela murne
ure æghwylc sceal    ende gebidan
worolde lifes      wyrce se þe mote
domes aér deaþe     þ bið drihtguman 1388
unlifgendum      æfter selest
áris rices weard      uton hraþe feran
grendles magan     gang sceawigan.
Ic hit þe gehate     no he on helm losaþ.
ne on foldan fæþm     ne on fyrgenholt. 1393
ne on gyfenes grund     gá þær he wille
ðys dogor þu    geþyld hafa
weana gehwylces      swa ic þe wene to.
ahleop ða se gomela     gode þancode
mihtigan drihtne      þæs se man ge/ (spræc) 1398 161r
þa wæs hroðgare    hors ge(bæted)
wicg wundenfeax      wisa fengel
geato(lic) gende      gumfeþa stop
lindhæbbendra      l(astas) wæron
æfter waldswaþum    wide gesyne 1403
gang ofer grundas      gegnum <..> for
ofer (myr)can mor      magoþegna bær
þone selestan      sawolleasne
þara þe mid hroðgare    hám eahtode
ofereode þa      æþelinga bearn 1408
steap stanhliðo     stige nearwe
enge anpaðas      uncuð gelad
neowle næssas     nicorhusa fela.
he feara sum      beforan gengde
wisra monna    wong sceawian 1413
oþ þ he færinga    fyrgenbeamas
ofer harne stan      hleonian funde
wynleasne wudu      wæter under stod
dreorig 7 gedrefed     denum eallum wæs
winum scyldinga      w{æ}rce on mode 1418
to geþolianne     ðegne monegum
oncyð eorla gehwæm     syðþan æscheres
on þam holmclife    hafelan metton
flod blode weol      folc to sægon
/ (hatan) heolfre       horn stundum song 1423 161v
fu(slic) [f]{orð}leoð feþa eal gesæt.
gesawon ða æfter (wæt)ere    wyrmcynnes fela
sellice sædracan    (sun)d cunnian
swylce on næshleoðum    nicras (li)cgean.
ða on undernmæl    oft bewitigað 1428
sorhfulne sið      on seglrade
wyrmas 7 wildeor       hie on weg hruron
bitere 7 gebolgne     bearhtm ongeaton
guðhorn galan      sumne geata leod
of flanbogan      feores getwæfde 1433
yðgewinnes      þ him on aldre stod
herestræl hearda     he on holme wæs
sundes þe sænra     ðe hyne swylt fornam.
hræþe wearð on yðum    mid eoferspreotum
heorohocyhtum      hearde genearwod 1438
niða genæged     7 on næs togen
wundorlic wægbora     weras sceawedon
gryrelicne gist      gyrede hine beowulf
eorlgewædum      nalles for ealdre mearn
scolde herebyrne      hondum gebroden 1443
sid 7 searofah      sund cunnian
seo ðe báncofan      beorgan cuþe
þ him hildegrap    hreþre ne mihte
eorres inwitfeng      aldre gesceþðan.
ac se hwita helm. / (h)afelan werede 1448 162r
se þe meregrundas    men(gan) scolde
secan sundgebland      since geweo(rðad)
befongen freawrasnum    swa hine fyrndagum
worhte wæpna smið     wundrum teode
besette swinlicum      þ hine syðþan no 1453
brond ne beadomecas    bitan ne meahton.
Næs þæt þonne mætost      mægenfultuma
þ him on ðearfe lah    ðyle hroðgares
wæs þæm hæftmece    hrunting nama
þ wæs an foran    ealdgestreona 1458
ecg wæs iren      atertanum fah
ahyrded heaþoswate     næfre hit æt hilde ne swac
manna ængum      þara þe hit mid mundum bewand
se ðe gryresiðas    gegan dorste
folcstede fara      næs þ forma sið 1463
þ hit ellenweorc    æfnan scolde.
huru ne gemunde      mago ecglafes
eafoþes cræftig     þ he ær gespræc
wine druncen      þa he þæs wæpnes onlah.
selran sweordfrecan     selfa ne dorste 1468
under yða gewin      aldre geneþan
drihtscype dreogan       þær he dome forleas
ellen/(mæ)rðum      ne wæs þæm oðrum swa        162v
syðþan (he) hine to guðe    gegyred hæfde.